نبداو بالمقادير
1 كيلو دقيق (الفورص)
1 خمارة الحلوة
1 فاني
كاس الزيت (العنبة)
2 معالق خميرة العجينة
1 فرماجة
1 بيضة
2 معالق كبار حليب نيدو (بودرة)
كاس سنيدة ( المقدار حسب الرغبة)
+نصف لتر من الحليب الدافئ للعجن
--------------------------
زبدة + زيت + خمارة حلوة ( باش نورقوا العجين)
-----------
الطريقة حسب تسلسل الصور
من بعد منخلطو المقادير كلها وتندامج مزيان
العجينة تكون شوية مرخوفة نديروها على شكل كرة ونغطيوها حتى تتخمر مزياااان
و يتضاعف حجمها...
من بعد نبداو نشكلوها كويرات متوسطين فالحجم كيفما واضح فالصورة
و نخليوهم يخمرو شوية بعدما نغطيوهم
نشدوا كل كرة ندلكوها و ندهنوها بخليط (الزبدة مذوبة والزيت + خمارة)
نخليوها على جنب حتى ندلكو كرة ثانية عاد نحطوها فوقها
وهكذا نستمروا بنفس العملية حتى نحصلو على طبقة من العجين المورق
مكون تقريبا من 6 حتى ل 8 كويرات
نقطعوا العجين اللي حصلنا عليه على هاد الشكل
نعملوا لو الشكلاط فالجناب بهاد الطريقة
ونبداو نلويوا العجين ديالنا
نحصلوا على هاد الشكيل نستفوهم فاللاطة
ونخليو بيناتهم مساحة حيت عاد كيتزادو فالفرن
و هاهي دي الكرواصون و جدات
بالصحة والراحة
اللهم أدمها نعمة و بارك لنا فيها و احفظها من الزوال
و اجعل فيها الصحة والعافية
في أمان الله حبيباتي
